Tilgangur lífsins

Er tilgangur lífsins að fara eftir breskum lögum?

Samkv. lesningu á þessum bresku lögum þá eru bresk lög álíka gáfuleg og breskir lögregluþættir. Eina fólkið sem ég man eftir að fíli breska lögguþætti eru systir mín, kærastan og stuðboltarnir á elliheimilinu. Ég man bara eftir tveimur breskum þáttum sem virkilega hafa náð að gera sig, það eru þættirnir með snillingunum í Litla Bretlandi og The Benny Hill show. Við Benny Hill þættina tengi ég grænan ís með súkkulaði og heimatilbúinn shake sem ég var vanur að búa mér til þegar ég var yngri. Ég man meira að segja uppskriftina... stórt glas fyllt með vanilluís, 2-3 teskeiðar Nesquik, glasið fyllt upp með mjólk og hrært vel. Mig langar í ís!!
Ef einhver man eftir góðum breskum þáttum þá endilega látið mig vita... bannað að nefna Inspector Morse, Taggart, Jack Frost og Hercule "Poirot"!!! Þessa gaura á að setja saman í 600 watta Clatronic blandarann sem fæst í Vörutorginu og sturta svo niður í klósettið.

En fyrir þá sem ekki hafa kynnt sér tíu fáránlegustu lögin að mati Breta þá eru þau hér að neðan:

Það er ólöglegt að deyja í breska þinghúsinu. (27% völdu þessi lög)
Það jafngildir föðurlandssvikum að snúa frímerki með mynd af meðlimi bresku konungsfjölskyldunnar á hvolf. (7%).
Það er ólöglegt fyrir konur í Liverpool að ganga um berbrjósta nema þær starfi við afgreiðslu í verslun sem selur hitabeltisfiska. (6%).
Það er bannað að borða kjötbökur á jóladag (5%)
Í Skotlandi verður fólk að hleypa þeim einstaklingum inn sem berja á dyr og óska eftir að komast á klósettið. (4%).
Ófrískar konur mega kasta af sér vatni hvar sem er, þ.á.m. í hjálm lögreglumanns. (4%).
Höfuðið á dauðum hval, sem finnst einhversstaðar við strendur Bretlands, verður eign konungsins. Drottningin eignast sporðinn. (3,5%).
Það er ólöglegt að reyna komast hjá því að segja skattheimtumanni allt sem þú vilt ekki að hann viti, en það er löglegt að greina honum ekki frá upplýsingum sem þér er sama að hann viti um. (3%).
Það er ólöglegt að mæta í þinghúsið íklæddur brynju. (3%).
Það er leyfilegt að myrða Skota innan gömlu borgarmúranna í York, en aðeins ef hann er með boga og örvar. (2%).

Ein spurning... ef ég, Bogi róni og Örvar róni förum til York og hittum Sir Alex Ferguson (sem er skoti) innan gömlu borgarmúranna, má ég þá drepa hann??

Og ég sem hélt að ég þjáðist af ritstíflu....

Góðar stundir

	Það er bannað að deyja í þinghúsinu
Ábyrgðarmaður færslu Tilkynna um óviðeigandi tengingu við frétt

Er tilgangur lífsins að planta sér fyrir framan myndavél?

Ég fékk sendar myndir af mér í gærmorgun með því bráðskemmtilega tæki sem nefnt hefur verið tölvupóstur. Eftir að hafa virt þessar skemmtilegu myndir vel fyrir mér komst ég að þeirri niðurstöðu að líklegast er það best fyrir mig þegar ég verð myndaður næst, að það verði tekin gervihnattarmynd!!

Góðar stundir

Er tilgangur lífsins að gefa út greatests hits disk?

Já fínt, já sæll, já fínt, já sæll, já fínt, já sæll, já fínt, já sæll.... Nylon af öllum böndum er að fara að gefa út greatest hits album.... Eigum við að ræða það eitthvað eða..?? Já fínt, já sæll við skulum ræða það. Ég er svo sem ekki mikið á móti þessum dúllurössum, þær eru alveg ágætis stúdíó söngdívur en allir geta farið í stúdíó og hljómað ágætlega, og lögin sem dúllurassarnir hafa gefið út… já fínt, já sæll. Live hljóma þær bara því miður ekki, ég hef alla veganna ekki orðið vitni af því. Svo hvað er eiginlega málið með þessa útgáfu?? Fyrir það fyrsta, er það ekki frumskilyrði þegar maður gefur út greatests hits plötu að maður hafi gefi út "hittara" eða jafnvel tvo. Ég hélt það og ég man ekki eftir lagi frá þeim sem hefur riðið um héröðeins og eldur í sinu. Ég er kannski bara að misskilja þetta, eru þær kannski að fara að láta mann hafa tóma diska svo maður geti skrifað uppáhalds lögin sín þá.

En ef þetta er veruleikinn þá ætla ég að skella mér í stúdíó með hálft kíló af California súkkulaði rúsínum og freta nokkrum þreklega í míkrófóninn og gefa út geisladiskakvikindi er nefnt verður Greatest hits… eða jafnvel greatest farts!!

Góðar stundir

Er tilgangur lífsins að hafa Disney þema í afmælinu sínu?

Ég verð þrítugur á næsta ári, spurning um að maður skelli sér á þetta þema. Ég er viss um að Eyrnaslappi vinur Bangsímons, Naggur, fúli dvergurinn hennar Mjallhvítar gætu komið og gert einhverja góða hluti. Ég efast um að ég nái því að bjóða alveg 60 manns, spurning um að auglýsa bingó í leiðinni svo bingórotturnar droppi við og sjái Eyrnaslappa og Nagg fara með gamanmál.

En þetta 4 ára afmæli sem Heather Mills hélt fyrir barnið sitt, og kostaði ekki nema 12,4 millur, kennir barninu hennar og Paul McCartney, svo sannarlega að sjá hlutina í réttu ljósi, þ.e.a.s. að það þarf ekkert að hafa fyrir lífinu.

Góðar stundir

	Disney þema í afmæli dóttur Mills og McCartney
Ábyrgðarmaður færslu Tilkynna um óviðeigandi tengingu við frétt

Er tilgangur lífsins að vera langlífur?

Já já, þeir voru að finna 400 ára íslenska kúskel sem er líklegasta langlífasta dýr sem sögur fara af. Ég vorkenni þessari kúskel, það er örugglega ekki margt skemmtilegt sem þessi elska hefur haft fyrir stafni síðustu 400 ár, ekki nema að það sé full time job að næra sig og halda skelinni harðri.

En mér er spurn, ætli hún sé orðin elliær??

Góðar stundir

	Íslensk kúskel líklega elsta dýr heims
Ábyrgðarmaður færslu Tilkynna um óviðeigandi tengingu við frétt

Er tilgangur lífsins að vera alltaf síðastur?

Þeir síðustu verða fyrstir.... þvílíkt bull sem þessi setning er. Ég man aldrei eftir því að hafa verið fyrstur eftir að hafa verið síðastur, hef iðulega verið fyrstur í því að vera síðastur. Þegar kemur að því að vera staddur einhvers staðar úti að borða með fjölda fólks þá virðist það ekki skipta neinu máli hvar ég treð afturendanum á mér niður, alltaf skal mitt borð verða síðast í röðinni.

Ég lenti í þessu tvisvar sinnum í gær, alveg ótrúlegt. Er þetta út af því að ég er rauðhærður... ég meina, kastaníubrúnhærður??

Eftir rúmlega 29 ár þá er ég nú samt eiginlega byrjaður að venjast þessu, en ég skal segja ykkur það að þeir síðustu verða sko aldrei fyrstir!

Góðar stundir

Er tilgangur lífsins að vera rauðhærður?

Ekki finnst grísalöppu það, og fyrir þá sem vita ekki hver grísalappa er þá er það rekstrarleigubarnið sem flutt er að heiman. Hún átti 19 ára afmæli í gær bæ þe vei og fær hún slatta af hamingju óskum frá mér í tilefni þess. En hvað um það, þegar ég er að stríða grísalöppu þá er það versta sem hún getur sagt við mig "Þú ert rauðhærður!". Ég á ekki mjög erfitt með það að sætta mig við þessa staðreynd en ég læt sem þessi ummæli særi mig djúpt með því að koma mér í hlutverk í grískum harmleik og þykjast gráta með miklum ekka.

En það er sem sagt frekar langt síðan að það var byrjað að gera grín af okkur í rauðhærða kynstofninum fyrst að það hefur verið sannað að neanderthalsmenn hafi verið rauðhærðir. Samkv. grein sem ég las á netinu þá eru 600.000 ár síðan neanderthalsmenn komu fram á sjónarsviðið, við erum því að tala um 600.000 ár af stríðni. Eigum við að ræða það eitthvað eða..?? Stríðnin hefur reyndar færst aðeins yfir á ljóskurnar, þær eru margar svo dúmm í hóveð eins og Daninn myndi orða það, og hafa þær dregið athyglina töluvert frá því síðustu ár.

Nú þurfum við í rauðhærða stofninum að koma af stað svarthærðum, brúnhærðum, skollituðum, grænhærðum, fjólubláhærðum og skallabröndurum, jú og auðvitað fleiri ljóskubröndurum, því "eigi skal hefna" er bara bullsetning!!

Góðar stundir

	Vísbendingar um að sumir neanderthalsmenn hafi verið rauðhærðir
Ábyrgðarmaður færslu Tilkynna um óviðeigandi tengingu við frétt

Er tilgangur lífsins að spila luft-golf?

Hefur engum dottið í hug að spila luft-golf? Er ekki hægt að gera það eins og að spila á luft-gítar?

Ég sé marga kosti við luft-golf spilun, það getur t.d. fjöldi fólks komið saman á einum teig, og þú getur alltaf þrumað eins og þú vilt og þarft ekki að hafa neinar áhyggjur af slóðunum eru röltandi um í hægðum sínum og gera ekkert annað en að þvælast fyrir þér á brautinni.

Góðar stundir

	Icelandair skildi 30 golfsett eftir á Íslandi
Ábyrgðarmaður færslu Tilkynna um óviðeigandi tengingu við frétt

Er tilgangur lífsins að fjalla um hægðir?

Einhverra hluta vegna virðist það aldrei réttur tími til að tala um hægðir, hvers vegna? Mér finnst það algjör hægðarleikur að tala um hægðir, ég gerði meira að segja nokkrar tilraunir í dag til að brydda upp á þessari umræðu. Ég beið t.d. spenntur eftir góðri þögn í salnum sem ég vinn í og þegar hún kom stóð ég upp sperrtur og spurði salinn, “Hvenær er eiginlega rétti tíminn til að tala um hægðir?” Eins bar ég þessa spurningu upp í kaffinu

Til að gera stutta sögu styttri þá var hægðartregða á svörum frá kollegum mínum, svörin einfaldlega komu ekki.

Ég held að það sé bara að það sé akkúrat enginn tími réttur til þess að tala um hægðir, allavegana var það enginn hægðarleikur fyrir mig í dag að fá fólk til að dýfa sér í ofan í þessa umræðu. Er fólk kannski með svo mikla hægðartregðu að það á hreinlega ekki hægt um vik að ræða svona hægðarlegt umræðuefni?

Í framhaldi af þessu... af hverju tekur enginn mig alvarlega?