Er tilgangur lífsins að eiga viðburðaríka nótt?

Það er sjálfsagt einhver sem les þessa fyrirsögn og hugsar eitthvað dónó, en það var ekkert  „gott í kroppinn“ í gær svo það fylgja engar erótískar þessari bloggfærslu.  

Þetta byrjaði allt þannig að Salka fæddist árið 1998, síðustu nótt kom hún svo upp í svefnherbergi, nánar tiltekið kl. 04:12 ef ég man rétt, en hún hafði lagt upp í klósettferð sem endaði með ósköpum.  Á leið sinni til baka klappaði hún Kjartani kanínu sem var í hörku fíling við naga búrið sitt með þeim afleiðingum að Kjarra greyinu brá svo svakalega að hann beit Sölku skinnið til blóðs.  Kjartan talaði um það eftir verknaðinn að hún hefði smakkast eins og Bónus kjúklingur. 
Sölku skinnið prílaði, sem áður sagði, upp á efri hæðina og vakti mömmu sína, Stefán Geirharður, a.k.a. Muggur, var þá nývaknaður og lá öskrandi á milli mömmu sinnar og pabba. 

Ég vissi eiginlega ekki hvaðan á mig stóð veðrið þegar mér var skipað að passa barnið meðan að Jóna fór fram og bróderaði fyrir sárið á Sölku.  Stevie G. hélt áfram að öskra og ágerðust öskrin eftir að mamma hans yfirgaf hinn heillum horfna skeiðvöll því ég vissi varla hvort ég var vakandi eða sofandi, en var samt að reyna að hugga vesalinginn.
Móses hugsaði sér gott til glóðarinnar og lagðist kylliflatur yfir bælið mömmu sinnar.  Loksins þegar Jóna kom aftur, sem var líklega eftir ca. 1 og hálfa mínútu fékk ég fyrirlestur um að hugga ekki guttann, man ekkert eftir lestrinum og hundinum var skipað að færa sig, sem hann gerði að sjálfsögðu ekki fyrr en ég dró hann til mín og lét hann liggja á milli lappana á mér.  Þar lá hann í mestu makindum og þegar ég var kominn á þreklegan fallhraða  inn í draumalandið gerðist það.  Móses tók netta byltu milli lappa mér og kramdi á mér punginn í leiðinni!!    Eftir að hafa notað örfá sekúndubrot til að átta mig á stöðunni færði ég hvutta af þessu af viðkvæma og friðaða svæði og sváfum vel þar til að vekjarinn byrjaði að urra á mig kl. 7:00.

Ég bíð spenntur eftir næstu nótt 

Góðar stundir

Er tilgangur lífsins að njóta útsýnisins?

Við Móses vorum úti í garði að pissa og ég er að segja ykkur það að veðrið gerist ekki mikið fallegra úti núna.  Það er heiðskírt og geislar fulla tunglsins glansa á mjöllinni sem liggur ofan á fjallahringnum og teygir sig niður í miðjar hlíðarnar.  Ég var að hugsa það úti á meðan að Móses naut þess að sletta úr skinnsokknum að það væri magnað ef ég gæti slökkt á öllum ljósunum í bænum og bara notið útsýnisins.

Stefán Geirharður, sem gengur einnig undir nafninu Muggur, er 4 vikna gamall í dag, sem segir mér að ég er búinn að vera sibbinn í 3 og ½ viku.  Þann 16. verður hann svo mánaðar gamall og höfum við ákveðið að leigja íþróttahúsið fyrir lítinn afmælisfagnað.  Íbúum, gestum og öðrum á norðurlandi vestra, eystra og eista er boðið, fríar blöðrur og candyfloss á staðnum.

Góðar stundir

Er tilgangur lífsins að vera þjóðnýttur?

Ég er búinn að vera tölvulaus undanfarna daga og vikur og þar af leiðandi hefur maður ekki verið að ergja samborgara mína og aðra hamborgara með afbragðs þvælu.  Ekki mikið hefur gerst í þjóðlífinu síðan ég bloggaði síðast svo maður hefur ekki haft úr neinu að moða.  Að vísu hefur krónan verið í frjálsu falli líkt og fallhlífalaus fallhlífarstökkvari, þrír stærstu bankar Íslands hafa verið þjóðnýttir, ég heyrði orð sem ég hef aldrei heyrt áður en það er sögnin að vera þjóðnýttur, íslenska útrásin breyttist í innrás og ástæðan fyrir því að Ísland er að komið á sama stall og Zimbabwe er allt einhverjum 20 blýantsnögurum að kenna.  Sem sagt, fréttamaturinn hefur nánast ekki verið neinn síðan ég síðast bloggaði.

Ég get með sanni sagt að ég hef oft sofið meira en síðustu vikur enda er komið nýtt hljóð í svefnherbergið.  Guttinn minn, sem ég kalla Stefán Geirharð (Steven Gerrard), er svo sannkallaður dag- og næturdrykkjumaður og sér maður hann varla öðruvísi en með brjóst fast við andlitið á sér.  Hann rífur sig upp á ca. tveggja tíma fresti og fær sér einn einfaldan, ropar svo og heldur áfram að lúlla. 

Nú er kominn tími á að skipta um kúkableyju, Daníel out!

 

Góðar stundir

Er tilgangur lífsins að verða faðir?

Kæra veröld, í gær upplifði ég besta dag lífs míns hingað til, ég er orðinn faðir!!!  Mig langaði bara að deila þessu með þér, kæra veröld. 

Ég mun koma með sólarsöguna þegar mér hættir að vefjast tunga um tönn og hugurinn er byrjaður að starfa almennilega, þessa stundina er ég of hátt uppi, hamingjuvíman er að fara með mig. 

Kæra veröld, fyrirgefðu væmnina.

Góðar stundir

Er tilgangur lífsins eiga góða helgi?

Hún var mjög skemmtileg þessi helgi sem var að líða.  Skemmtilegheitin byrjuðu á föstudaginn á slaginu 18:00 þegar ég lagði upp í minn fyrsta tónleikatúr um landið.  Tóti svili fékk mig og Guito tónlistarkennara til að framkvæma með sér hugmynd sem hann fékk, að halda tónleika í þremur byggðarlögum sama kvöldið.  Flutt var efni eftir Tóta og raddaði ég og var með áslátt, spilaði til að mynda á bongó trommur og það hef ég ekki gert áður.  Það kom upp úr kafinu að syngja og spila á bongó trommur er alveg asskoti erfitt.  Þetta ævintýri byrjaði í Ólafsfjarðarkirkju, svo var haldið í hina smávöxnu Knappstaðarkirkju og endað í Siglufjarðarkirkju.  Þessi túr var stórskemmtilegur og tónleikarnir í Knappstaðarkirkju var það sem stóð upp úr.  Ekkert rafmagn er í kirkjunni svo hún var lýst upp með kertaljósum og tónlistargestirnir fimm, sem fylltu nærri því helming bekkjanna í kirkjunni, upplifðu ógleymanlega stund sem og tónlistarmennirnir.  Orkan og stemningin sem myndaðist þarna er ólýsanlegt fyrirbæri og var það æðislegt að upplifa svona stund. 

Laugardagurinn byrjaði stórkostlega þegar Liverpoolsigraði Man. Utd. í stórslag helgarinnar í enska boltanum.  Við Sundlaugarvörðurinn fór svo í góðan göngutúr með hundana og svo var bara afslöppun sem eftir lifði dags.

Dagurinn í dag byrjaði garðinum, maður kominn út um 10:00 og hafði sig inn um 21:00 en þá var búið að snyrta runnana, sækja nokkur hundruð kíló af grjóti, festa upp hlið, raða grjóti og finna það út að Vangelis samdi lagið Chariots of fire sem er eitt mesta íþrótta-slow-motion-klippu-lag sem sögur fara af. 

Kvöldið endaði svo í með dramatískri spennu-barnsfæðingar-hryllingsmyndinni “Þegar Mats fæddist” frá því herrans ári 1983.  Mér leið nú ekkert svakalega vel að horfa á barnið hlykkjast út úr klofinu á vesalings konunni en Jóna hafði meiri áhyggjur af rauðu sportsokkunum sem hún var í. 

Á morgun leggjum við Jóna svo upp í ferð til Akureyris, spurningin er sú hvort við komum tvö eða þrjú til baka. 

Góðar stundir

Er tilgangur lífsins að vera klukkaður?

Já viti menn, ég var að þvælast á heimasíðu hjá frænku minni, henni Rakel, og haldið þið að ég hafi ekki verið klukkaður.  Maður með fæðingarstress á háu stigi má varla við svona löguðu en svona lítur þetta út: 

Fjögur störf sem ég hef unnið um ævina:
Bæjarvinnan
Fiskvinnsla hjá pabba
Í Aðalbakarí
Lífeyrisþjónustan hjá SPS

Fjórar bíómyndir sem ég held upp á:
Lord of the rings – Fellowship of the ring
Lord of the rings – The two towers
Lord of the rings – The return of the king
National Lampoons Christmas Vacation

Fjórir staðir sem ég hef búið á:
Siglufjörður
Sauðárkrókur – heimavist
Daugaard í Danmörku
Eeehhhh.… Siglufjörður

Fjórir sjónvarpsþættir sem mér líkar:
Friends
King of queens
Litla Bretland
Dog wispherer

Fjórir staðir sem ég hef heimsótt í fríum:
Kóngsins Köbenhavn
Rimini á Ítalíu
Feneyjar á Ítalíu
Lúxemborg

Fjórar síður sem ég skoða daglega (fyrir utan bloggsíður):
Fotbolti.net
Liverpool.is
Mbl.is
Sksiglo.is 

Fernt matarkyns sem ég held uppá:
Lambakjöt
Nautakjöt
Svínakjöt
Skíthoppari a.k.a kjúklingur

Fjórar bækur/blöð sem ég les oft:
Tunnan
Meðganga, fæðing, ungbarnið
Meðganga, fæðing, ungbarnið
Meðganga, fæðing, ungbarnið

Fjórir staðir sem ég myndi helst vilja vera á núna:
Á Anfield – verst að það er enginn leikur í gangi
Köben
American style
Á Akureyri, og kominn með erfingja í fangið

Ég klukka alla þá sem kíkka á þessa síðu þann 11.09.08 

Góðar stundir

Er tilgangur lífsins að fá lottó?

“Jessss….” hugsaði ég þegar ég las þessa fyrirsögn og dansaði indíánadans í eldhúsinu, en svo áttaði ég mig á því að ég gleymdi að lotta!!    Það var kannski eins gott því ég vinn aldrei neitt í neinu sem heitir Lottó eða eitthvað annað en aðalástæðan gæti verið sú að ég tek aldrei þátt.  Ég reyndar fékk hörku vinning þar síðast þegar ég lottaði en ég halaði inn hvorki meira né minna en 430.- krónur og það tekur maður sko ekki upp úr skítnum, ég kom reyndar út með 770.- króna tap.  Ég keypti svo auðvitað annan miða fyrir þennan ímyndaða ágóða og að sjálfsögðu endaði ég þar af leiðandi með tap upp á 1.970.- krónur því ekki vann ég á þann miða.    Ég á kannski ekki að vera að standa í því að lotta, en ef maður tekur ekki þátt þá á maður auðvitað aldrei sjéns á því að vinna. 

Maður ætti samt kannski að vera duglegri við að taka þátt í lotteríum lífsins, því líklega er það rétt sem segir í textanum, að “lífið sé lotterí”. 

Góðar stundir

Einn með allar tölur réttar

Er tilgangur lífsins að vera tilbúinn?

Haustið er að ganga í garð og það þýðir bara eitt… það fer að gefast tími til að blogga.  Og þó, eins og alþjóð líklega veit þá á maður von á erfingja svo heima fyrir hefur verið nóg að gera, inni og úti.  Eins og síðasta sumar hefur maður verið eins og moldvarpa í garðinum og það mun halda áfram þangað til veðrið verður orðið óþolandi.  Ég get með fullum hálsi sagt að ég sé orðinn fíkill og garðurinn er dópið mitt.  Ég upplifði það um daginn að geta ekki haldið áfram í garðinum vegna myrkurs… krrrreisí!! 
Ég hef komið sjálfum mér skemmtilega á óvart í sumar með tvennum hætti.  Fyrir það fyrsta er lofthræðslupúkinn ég, búinn að vera að arka á fjöll í allt sumar.  Ég kom svo fjölskyldu minni skemmtilega á óvart þegar ég tók upp hamar, sög, blýant og hallarmál, sem sýnir hallann mismunandi eftir hvernig maður snýr því, frá IKEA, borvél frá Europris og reisti eitt stykki ruslatunnuskýli með hjólastöndum.  Ég er ekki frá því að menn og konur í familíunni hafi misst legvatnið við þessi tíðindi. 

Já og talandi um legvatn, ljósmæður eru á leið í verkfall á morgun.  Ég vil nota þetta tækifæri og þakka ljósunum kærlega fyrir að auka á stress mitt, án ykkar væri ég ekki kominn með magasár og stífkrampa í axlirnar, en gangi ykkur samt vel elskurnar og ekki hugsa of mikið um mig.  Ég er búinn að redda mér handklæðum, flatkjöftu, soðnu vatni sem ég geymi í ísskápnum og byggingarplasti ef ég þarf sjálfur að koma honum í heiminn hérna heima og er búinn að gera allskonar ráðstafanir.  Fæðingin verður að fara fram á Akureyri svo bensíni hefur verið dælt á bílinn, ég er búinn að pakka niður fyrir ferðalag og búið er að panta gistingu fyrir börn, hund og kanínu.  Einnig hef ég skipað svo fyrir að Jóna fær ekki lengur að sitja í sófanum, ég vil ekki eiga það á hættu að legvatnið fari ekki í hann. 

Eftir sónarinn í dag fékk ég lánaða bíómynd hjá ljósunni svo núna er það bara popp, kók og hin æsilega norska fæðingarmynd “Þegar Mats fæddist”.  Ég vona að það líði ekki yfir mig í sófanum. 

Góðar stundir

Læknar lýsa yfir stuðningi við ljósmæður

Er tilgangur lífsins að vera garðálfur?

Ástæða bloggleysis síðustu vikur og mánuði er sú að ég hef verið límdur við garðinn minn, andlega, líkamlega og næstum því kynferðislega.   Ég brá því á það ráð að skella mér á E-bay og versla mér eitt stykki bloggfærslu og er hún hér að neðan.  Ég vona að þið njótið vel og hafið gaman af.


Роман aрендуем офис в бизнес-центре класса А или В (ЮВАО или ЮЗАО Москвы) от комиссии. Консалтинговая компания Первый арбитраж бесплатно tолько победы 

Профессиональный арбитраж для малого и среднего Бизнеса.  Уникальные методы победы в арбитражном суде любой инстанции.

*     Первый арбитраж бесплатно!
*     Срок подготовки и подачи иска в арбитраж - 4 дня!
*     Мы действительно профессионалы!  

ПРОЦЕДУРА:
бесплатная консультация в целях получения общего представления о деле 

*     идентификация (формулирование) целей и задач
*     разработка и утверждение стратегии ведения дела
*     формирование (сбор) доказательств по делу
*     подготовка искового заявления и обращение в арбитраж
*     последовательное участие в судебных заседаниях
*     получение решения арбитража
*     апелляционное, кассационное обжалование решения (судебного акта)
*     вступление решения (судебного акта) в законную силу
*     получение исполнительного листа
*     предъявление исполнительного листа для принудительного в службу судебных приставов
*     исполнение (принудительное исполнение) решения арбитража
*     подписание акта приема-передачи оказанных услуг

Для получения дополнительной информации Вы можете обращаться по нижеуказанному телефону. 


Góðar stundir

Er tilgangur lífsins að spila bolta?

Ég skellti mér í oldboys fótbolta í gær eins og ég hef gert í allt sumar á þriðjudögum og fimmtudögum… nema á miklum rigningardögum.  Ég hef nú aldrei verið talinn vera góður knattspyrnumaður, var alltaf bara efnilegur.  Ef ég ætti að skilgreina leikstíl minn, þá myndi ég segja að ég væri blanda af Steven Gerrard, Andrési Önd og the Roadrunner… mí mí… brrrummmmm…  Hefði eiginlega þurft að hafa sound fæl hérna til að allir nái þessu    Til að gera langa sögu agalega stutta þá spiluðum við í tæpan einn og hálfan tíma, liðið mitt skoraði ekki mark en fékk 15 á sig.  Mottóið „Ef þú ætlar að tapa, tapaðu þá með stæl“ var í hávegum haft í gær. 

En að allt öðru og skemmtilegra efni, þann 26.07.08 átti ég 1 árs blogg afmæli.  Af því tilefni íhugaði ég að fara úr bænum til að þurfa ekki að taka á móti þeim fjölmörgu gestum sem mögulega myndu koma keyrandi, fljúgandi, siglandi, fjórhjólandi, tvíhjólandi, einhjólandi eða labbandi langar vegalengdir til að samfagna tilgangi lífsins og útbreiðslu hans um netheima, sem hefur reyndar ekki verið nein, en það var ekki þörf á því í þetta sinn.  Það hafa margar vitlausar bloggfærslur fengið líf á þessari síðu og það er víst að það munu margar fleiri fá að líta dagsins ljós.

Hafið það gott um Verslunarmannahelgina, passið ykkur á jarmandi ullarpöddunum sem eiga það til að vafra á þjóðvegum landsins.

Góðar stundir